Ikasleek zientzia eta teknologiako proiektuen inguruko iradokizun eta aholkuak trukatuko ditzute, apirilaren 21ean Bilboko ‘Zientzia Azokan’ aurkezteko
‘Zientzia Azoka’ proiektuan parte hartzen ari diren Nafarroako Bigarren Hezkuntzako hainbat ikastetxetako (Leitzako Amazabal BHI, Zizurko IES Zizur BHI, Atarrabiako Pedro de Atarrabai DBHI, Noaingo Elortzibar BHI eta Zangotzako ikastola) ikasleek, martxoaren 14an Iruñeko Planetarioko ‘Parekoen topaketa deialdian hartuko dute parte; topaketaren helburua da NUPko ikertzaile gazteek ikasleekin proiektuak partekatzea. Ekimen honek, Nafarroako Foru Komunitatean, Nafarroako Unibertsitatearen, Planetarioaren eta Zientziaren Lagunen Klubaren laguntza du.
"Parekoen topaketa" izeneko saioa goizeko 10:00etan inauguratuko da, Planetarioko aretoan, eta han izango dira, besteak beste, Maria Gil Rodriguez Elhuyar Fundazioko Zientzia Unitateko arduraduna, Pablo Sanchis Gúrpide UPNAko Ikerketa Baliabideen eta Ikerketa Egituren Arloko zuzendaria, Joaquín Sevilla Moróder UPNAko Ezagutzaren Dibulgazioko arduraduna, Javier Armentia Fructuoso Iruñeko Planetarioko zuzendaria, eta Silvia Díaz Lucas Zientziaren Lagunen Klubeko lehendakaria.
‘Zientzia Azoka’ proiektua
Elhuyar Fundazioaren ekimen bat da: unibertsitateko atarian dauden ikasleek proiektu zientifiko edo teknologikoak sortzen dituzte ikasturtean zehar, unibertsitateko ikertzaile eta irakasleen aholkuak jasoz. Nafarroako ikasleek apirilaren 21ean Bilbon egingo den azokan aurkeztuko dizkiote publikoari beren lanak, horregatik du ekimenak Zientzia Azoka izena.
Zientzia Azokako parte-hartzaileek bi eta lau ikasle arteko talde txikiak osatzen dituzte, eta berek aukeratutako gai baten inguruan egiten dute lan. Bi modalitate daude: ikerketa-proiektua aukeratuz gero, ikasleek berek aukeratutako arazo edo galdera bati irtenbidea edo erantzuna aurkitzeko proiektu bat garatu behar dute. Proiektu teknologikoa aukeratuz gero, berriz, jarritako erronkari erantzungo dion produktu teknologiko bat gauzatu behar dute. Proiektuen aurkezpenak euskaraz, gaztelaniaz eta ingelesez egin daitezke. Ikasleek unibertsitateko ikertzaile profesionalen eta irakasleen laguntza dute proiektuak gauzatzeko, eta aukera dute haiekin bizipenak partekatzeko ere. Aurtengo Zientzia Azokan, Nafarroako 51 gaztek hartuko dute parte.
Esperientzia, ez lehia
Elhuyar Fundazioarentzat, ekimen honen antolatzailearentzat, Zientzia Azoka ez da lehiaketa bat, talde-lanean oinarritutako esperientzia aberasgarri bat baizik. Nafarroako bilkuran, beren proiektuak UPNAko ikertzaile gazteekin kontrastatuko dituzte ikasleek; ikerketarekiko konpromisoa handitzea da helburua.
Lau erakundeen (Elhuyar Fundazioa, Nafarroako Unibertsitate Publikoa, Nafarroako Planetarioa eta Zientziaren Lagunen Kluba) helburua da ikerketarekin konprometitutako Bigarren Hezkuntzako zentroen sarea indartzea Nafarroako foru-erkidegoan, unibertsitatearen atarian dauden ikasleen trebakuntza eta gaitasunak hobetzeko.
Elhuyar Fundazioa 1972an sortu zen, eta EAEn du egoitza. Zientziaren eta teknologiaren dibulgazioaren eta euskararen garapenaren alde jarduten duen irabazi asmorik gabeko erakunde bat da.
